太子十大碗

吞麵小子

又係十大碗！

今日約了朋友在荔枝角食我喜愛的西班牙菜，有美味的麵包、濃郁的西湯頭盤、主菜，甜品及茶，全部食晒，分量足夠，無須再吃下午茶了。做完些少購物，只是下午三點三，經過太子，就想起好耐冇食的十大碗雲吞麵。肚子不餓，但諗起那美味又有羅漢果甘甜味的湯底，都係忍不了要去食一碗。

去到店鋪門前，已經有十個八個未能入座或等外賣的客人，不喜歡等位的我亦只好乖乖地等。終於有位，無須考慮，即刻叫一碗招牌雲吞麵及一杯凍檸茶。在等候食物的短短幾分鐘內，正好品嚐放在面前的酸蘿蔔，正，胃口開晒。雖然店鋪坐滿客人，但雲吞麵來到時，外觀仍然非常之像樣，有韭黃及蝦子放麵條上，雲吞在麵條下。飲一啖湯，那甘甘的羅漢果味和濃郁的大地魚味充滿口腔，正！麵爽，彈牙，充滿蛋香，雲吞餡裏蝦與豬肉的比例合適，冇變！全碗雲吞麵連湯飲晒，碗底見埋，一點不剩。

雲吞麵是我最愛食物之一，在香港試過很多出名的店鋪，包括麥文記、正斗、何洪記、好旺角、盛記、麥奀記、劉森記、羅富記等，個人認為最難忘的仍然是十大碗。很多美食達人都報道過不同的雲吞麵店，很多不同的資料講述如何製麵、預備湯底、包雲吞、雲吞麵應有的大細等等，我沒有太多的形容詞，只能說，食雲吞麵食到見碗底，我記憶的只有十大碗。