九記牛什粉麵

吞麵小子

經常聽到不同媒體介紹位於鵝頸橋附近的九記牛什粉麵，更聽聞這間小店由星期一至星期六都大排長龍，所以好耐都未能扚起心肝去試一次。今次諗，星期六人龍會否短一些？點知去到已經有 20 幾 30 人排緊隊，走唔甩。用咗 25 分鐘排隊，終於輪到我，立刻揀牛膀牛肚加煎魚餅。

既然耐心等咗 25 分鐘，當然急不及待即刻試食。先試牛肚，嗯，是草肚，好腍，有三四件；牛膀，正常牛膀味，看來沒有特別加太多香料。聽講這店用的是新鮮食材（不用急凍的牛雜），記得多年前，一位在某名店主理牛雜牛腩的師傅說過，處理新鮮牛雜不一定要特別加香料，重用的湯底味道已經夠晒濃郁。

再試下個煎魚餅，這個反而有些驚喜。魚餅好鬆，味道啱啱好，浸過湯之後，魚餅仍然有少少香脆，正！唔怪得差不多人人都叫煎魚餅。如果唔趕時間，唔怕排隊，這間小店絕對值得一試，有時間亦會再來幫襯。